कारंजा येथील खेळाडूंची आंतरराष्ट्रीय तायक्वांदो स्पर्धेत उल्लेखनीय कामगिरी ७ सुवर्ण व ३ रजत पदक प्राप्त

प्रतिनिधी | कारंजा : नेपाळ युथ स्पोर्ट डेव्हलपमेंट कौन्सिल यांच्या वतीने दिनांक ३ ते ७ जानेवारी २०२६ या कालावधीत आंतरराष्ट्रीय तायक्वांदो चॅम्पियनशिप २०२५–२६ चे आयोजन पोखरा शहर, नेपाळ येथे करण्यात आले होते. या आंतरराष्ट्रीय दर्जाच्या स्पर्धेत भारतासह विविध देशांतील खेळाडूंनी सहभाग नोंदवला होता.
या स्पर्धेत कारंजा येथील तायक्वांदो खेळाडूंनी उत्कृष्ट खेळाचे प्रदर्शन करत भारताचे प्रतिनिधित्व केले आणि विविध वजन गटांमध्ये यश संपादन करत ७ सुवर्ण व ३ रजत पदके मिळवून कारंजा शहराचा नावलौकिक वाढविला.
महिला गटातील पदक विजेते खेळाडू पुढीलप्रमाणे आहेत :
पाखी राठोड – सुवर्णपदक,
अक्षरा चचाने– सुवर्णपदक,
सोनाली ठाकुर – सुवर्णपदक,
ऋतुजा सोनोने – रजतपदक.
पुरुष गटातील पदक विजेते खेळाडू पुढीलप्रमाणे आहेत :
प्रणव पाटील – सुवर्णपदक,
अरमान भुरीवाले – सुवर्णपदक,
ज्ञानेश ठोकळ – सुवर्णपदक,
रोहन पवार – सुवर्णपदक,
आयुष राठोड – रजतपदक,
भुषण गुडवार – रजतपदक,
अशा प्रकारे करंज्याच्या खेळाडूंनी आंतरराष्ट्रीय तायक्वांदो स्पर्धेत एकूण ७ सुवर्ण व ३ रजत पदकांची घवघवीत कमाई करून देशाचे नाव आंतरराष्ट्रीय स्तरावर उज्वल केले आहे.
या स्पर्धेत भारतीय संघाचे प्रशिक्षक म्हणून श्री. नितिन मेंढे यांनी जबाबदारी यशस्वीपणे पार पाडली. त्यांच्या मार्गदर्शनाखाली खेळाडूंनी शिस्तबद्ध सराव, तांत्रिक कौशल्य व आत्मविश्वासाच्या जोरावर हे यश प्राप्त केले.
या यशाबद्दल विजेत्या सर्व खेळाडूंचे, त्यांच्या आई-वडिलांचे, प्रशिक्षकांचे तसेच क्रीडाप्रेमी नागरिक व विविध क्षेत्रातील मान्यवरांनी अभिनंदन केले आहे. कारंजा परिसरात या यशामुळे आनंदाचे व अभिमानाचे वातावरण निर्माण झाले असून भविष्यातही खेळाडूंनी आंतरराष्ट्रीय स्तरावर अधिक यश संपादन करावे, अशी अपेक्षा व्यक्त केली जात आहे.